தொழுவத்தை இடித்து
ஒரு அறை வேண்டுமெனக்
கேட்டதால்
அடிமாட்டிற்கு விற்றுவிட்டு
அறை உருவாக,
கம்ப்யூட்டரும் நானும்
அவ்வறையில் ஒடுங்கினோம்.
அம்மாவுக்கு தான்
எதையும் பேச
யாருமே இல்லாது போனார்கள்.
தாமிரபரணியில் குளித்த தேகமென
அவ்வப்போது அலுத்துக்
கொள்கிறாள் கிழவி.
இப்போதும் ஊரிலிருந்து
கருப்பட்டியும் அப்பாவுக்கு பீடிக்
கட்டுகளும்
அனுப்பிக்கொண்டிருக்கிறார்
பெருமாள் சித்தப்பா.
கருப்பட்டி காப்பியில்
பொட்டுக்கடலை பொட்டுக்
குடிக்கிறபோதெல்லாம்
ஊர்கதைகளைப் பேசத்
தவறுவதில்லை கிழவி.
தனது பாம்படத்தைக் கழற்றி
எப்போதாவது சுத்தம் செய்கையில்
பீத்திக்கொள்வாள்,
அவளது கலியாணத்தில்
போட்டதென.
மேலுக்கு முடியாமல் கிடந்தபோது
தனது பாம்படத்தை அம்மாவிற்குக்
கொடுத்தபடியே இறந்துபோனாள்.
நா பெத்த மக்கா – யென
வாரியணைத்துக் கொஞ்சுகிற
கிழவி
போனதிலிருந்து
வீட்டில் யாரும் பேசுவதே
இல்லை
ஊரைப் பற்றி.
| மறுமொழிப்பெட்டி: | ||
Loading... | ||
No comments:
Post a Comment