பாடப்புத்தகங்களும் கனக்கின்றன!!

      நீ பிறந்தாய் 
      எனக்குள் ஒரு பூ பூத்து
      அப்பா எனும் வாசமாய்
      உடலெங்கும் கமழத் துவங்கியது..

      இன்றும் -
      உன்னிடம் நான் பெற்ற -
      பெரும் -
      பாடங்கள் ஏராளம், ஏராளம்;
      என் குழந்தை பருவ கேள்விகளுக்கு
      விடையும் -
      வளரும்போது சந்தித்த குழப்பங்களுக்குத்
      தீர்வையும்  உன்னிடமிருந்தே நான் பெற்றுக் கொண்டேன்.

      அப்படி -
      உன் ஒவ்வொரு அழுகையும்
      சிரிப்பும் -
      என்னையும் சேர்த்து சிரிக்கவும் அழவும் சிந்திக்கவும்
      வைக்குமொரு தருணத்தில் தான்
      பாடங்களை சுமந்து நீ பள்ளிக்குப் போகத் துவங்கினாய்;

      போகும்போது இதயம் வழிய
      கண்ணீரோடு போகும் நீ
      வரும்போது புத்தகப் பை நிறைய சிரிப்பை மட்டுமே
      வாரிக்  கொண்டு வந்தாய்;

      இது புரிந்தும் உன்
      அழும் விழிகளைத் துடைத்துவிட்டு
      எந்த கட்டாயத்தை சாதித்துக் காட்டிட
      உன் அழுகையினை மீறியும் உனைப்
      பள்ளிக்கனுப்புகிறோமோ' தெரியவில்லையடா...

      எப்படியோ போகட்டும் அதலாம்; இனி நீ
      வீட்டிலேயே இரு,
      விரும்பும் போது போ; படி; யென்று
      கைகட்டிக் கொண்டுவிட யிலாமல்
      நாளையை எண்ணி - இதோ நானும் உன்னோடு
      உனக்கான புத்தக பையையும் மதிய உணவுகளையும் சுமந்துக் கொண்டு
      நடக்கிறேன்;

      பள்ளிக்கூடம் வந்ததும்
      உன் கையை விட்டுவிட்டு போ என்கிறேன்,
      நீ வேண்டாம்பா
      நான் போகலைப்பா என்று அழுகிறாய்,
      நான் சற்று முகத்தை கடினமாக
      வைத்துக் கொண்டு போ' என்கிறேன்;

      நீ தேம்பியழுத கண்களைத் துடைத்துக் கொண்டு
      என்னை திரும்பிப் பார்த்து திரும்பிப் பார்த்து
      அழுதுக் கொண்டே போகிறாய்;
      நான் உன்னை பார்க்காமல்
      பள்ளிக் கூடத்து வாசலைக் கடந்து
      விருட்டென வீட்டிற்கு நடந்துவருகிறேன்;

      நான் உள்ளே அழும் அழையின்
      சப்தம் கேட்டு; நாளை நீ படித்து
      வாழத் தக்கவனாய் வருகையில்
      எனை உனக்குப் புரியலாம்போலென என்
      ஒவ்வொரு சொட்டுக் கண்ணீரும்
      பூமியில் சிந்திக் கொண்டே எனக்கு
      ஆறுதல் சொல்கிறது.

      
      பயத்தை எல்லாம் தூக்கி
      மூட்டைக் கட்டிப் போட்டுவிட்டு
      நேரமாகிவிட்டதை யுணர்ந்து
      அலுவல் நோக்கி ஓடுகிறேன்;
      அலுவல் வேலைகளுக்கிடையே யெல்லாம் - உன்
      அழுத முகமே ஆங்காங்கு தெரிகிறது; 

      முகத்திற்கு பின்னே உனக்குள்
      உன் விருப்பமின்றி திணிக்கப் படும்
      பாடப்புத்தகங்களும் கனக்கின்றன!!

மறுமொழிப்பெட்டி:		?
தமிழிலும் மறுமொழியிடலாம் Loading...